Ish-legjenda e futbollit polak, Zbigniew Boniek, ka lëshuar një paralajmërim të fortë përpara sfidës vendimtare të 26 marsit ndaj Shqipërisë, duke e cilësuar këtë përballje si një test me peshë të jashtëzakonshme për kombëtaren polake. Sipas tij, një humbje ndaj kuqezinjve do të përbënte një goditje të rëndë për gjithë futbollin polak, me pasoja serioze jo vetëm për trajnerin Jan Urban, por edhe për vetë ekipin.
Deklarata e Boniek vjen në një moment kur në Poloni po diskutohet gjerësisht edhe çështja e talentit 17-vjeçar Oskar Pietuszewski, i cili po spikat me fanellën e FC Porto-s. Trajneri Jan Urban është vënë nën kritika për kujdesin e treguar në raport me ftesën e mundshme për të riun, ndërsa tifozët dhe mediat kërkojnë me ngulm që ai të jetë pjesë e kombëtares në një ndeshje kaq të rëndësishme.
Në një intervistë për “Sport.pl”, Boniek doli në mbrojtje të Urbanit, duke theksuar se menaxhimi i një lojtari kaq të ri kërkon maturi dhe jo entuziazëm të tepruar. Sipas tij, hyrja në kombëtare për një debutues është gjithmonë e vështirë dhe emocionalisht e ngarkuar, ndaj barra e rezultatit nuk mund t’i lihet një 17-vjeçari.
Boniek kujtoi përvojën e tij personale, duke nënvizuar se një lojtar i ri hyn në fushë me mendimin për të mos gabuar, jo për të vendosur fatin e ndeshjes. Për të, përgjegjësia kryesore në një sfidë të tillë duhet të bjerë mbi lojtarët me eksperiencë, si Robert Lewandowski, Piotr Zieliński dhe figurat e tjera kyçe të përfaqësueses polake.
Megjithatë, ai nuk e fshehu bindjen se Pietuszewski është një nga zbulimet më të mëdha të futbollit polak në vitet e fundit dhe se Urban jo vetëm mund ta ftojë, por edhe ta aktivizojë nga minuta e parë, sidomos në kushtet kur Nicola Zalewski mungon për shkak pezullimi. Boniek theksoi se talenti i ri duhet mbrojtur nga presioni i tepërt dhe se shpallja e tij si “shpëtimtar” i kombëtares do të ishte e dëmshme si për lojtarin, ashtu edhe për vetë Poloninë.
Por thelbi i mesazhit të Boniek lidhet drejtpërdrejt me Shqipërinë, të cilën ai e konsideron një kundërshtar shumë të fortë, të paparashikueshëm dhe në një nga momentet më të mira të historisë së saj futbollistike. Ai vlerëson eksperiencën, inteligjencën taktike dhe aftësinë e skuadrës shqiptare për të goditur në momentet vendimtare, duke pranuar se kuqezinjtë nuk janë aspak një rival për t’u nënvlerësuar.
Madje, Boniek kujtoi edhe faktin se Shqipëria ka qenë më sipër se Polonia në një prej fushatave të fundit eliminatore, çka sipas tij tregon qartë forcën dhe rritjen e vazhdueshme të përfaqësueses shqiptare. Ai solli në vëmendje edhe ndeshjen e fundit në Varshavë, të fituar nga Polonia vetëm me rezultatin minimal 1-0 dhe pas shumë vështirësive, si provë se diferencat mes dy skuadrave janë shumë më të vogla nga sa mund të duken në letër.
Në fund, mesazhi i Boniek është i qartë: Polonia mund të konsiderohet favorite në teori, por përballë Shqipërisë nuk ka asgjë të sigurt. Sipas tij, kuqezinjtë kanë cilësinë dhe potencialin për të surprizuar në çdo moment, ndërsa për Poloninë kjo sfidë mbetet një ndeshje ku gabimet nuk lejohen.
Përballja e 26 marsit pritet kështu të jetë shumë më tepër sesa një ndeshje “play off”-i: një duel presioni, reputacioni dhe mbijetese sportive, ku Shqipëria hyn si një kundërshtar që gëzon respekt të plotë, ndërsa Polonia me frikën se çdo hap fals mund të kthehet në një tronditje kombëtare.