Kryetari i Sali Berisha, gjatë një konference me gazetarët, ka akuzuar qeverinë dhe kryeministrin Edi Rama për mashtrim ndaj pensionistëve, duke theksuar se rritja e fortë e çmimeve po godet rëndë këtë shtresë.
Berisha e cilësoi si “cinik dhe të pashpirt” qëndrimin e qeverisë ndaj pensionistëve, të cilët sipas tij janë ndër më të prekurit nga kriza dhe rritja e kostos së jetesës. Ai deklaroi se skema e bonusit, e përdorur gjatë zgjedhjeve të 11 majit, rezulton një mashtrim, pasi pensionistët nuk kanë përfituar ende nga fondi prej 240 milionë eurosh i depozituar për vitin 2025.
Sipas tij, megjithëse kanë kaluar disa muaj nga premtimet, “asnjë qindarkë” nuk është disbursuar deri më tani, duke ngritur dyshime se fondi po përdoret për qëllime të tjera dhe po mbahet për fundvit.
Berisha theksoi gjithashtu se skema përjashton një pjesë të madhe të përfituesve. Ai tha se mbi 45% e pensionistëve nuk marrin asgjë ose përfitojnë shuma minimale, duke përmendur se pensionistët me pension invaliditeti apo pensione të pjesshme janë ndër më të penalizuarit.
“Sot, dua të denoncoj qëndrimin cinik të pashpirt të qeverisë, Edi Ramës ndaj shtresës më vulnerabël, më të dëmtueshme që është shtresa e pensionistëve shqiptarë. Rritja stratosferike e çmimeve, e ndikuar thellësisht nga kriza energjetike, ka goditur dhe godet çdo ditë e më shumë këtë shtresë të mashtruar, të injoruar në shkallë ekstreme nga qeveria. Së pari dua të theksoj se skema e bonusit, e përdorur në zgjedhjet e 11 majit, pas zgjedhjeve faktohet një mashtrim i vërtetë. Kanë kaluar kaq muaj dhe pensionistët nuk kanë marrë një qindarkë nga fondi i depozituar në Bankën e Shtetit prej 240 milionë eurosh para të pashpenzuara gjatë vitit 2025. Sipas vendimeve të qeverisë dhe premtimeve, ato do u disbursoheshin si bonus pensionistëve. Asnjë qindarkë nga ky fond gjer sot nuk është disbursuar, çka do të thotë se ai po përdoret nga qeveria për qëllime të tjera dhe po ruhet që t’u jepet në fund të vitit.
Pra, nuk po u mundësohet pensionistëve me çmimet stratosferike që rriten nga java në javë, nga muaji në muaj. Së dyti, skema e bonusit është mashtrim pasi në këtë skemë mbi 45 përqind e pensionistëve nuk marrin asgjë, ose marrin thërrime, marrin dy kile domate apo tre kile tranguj. Faktikisht bonusi që përfitohet sipas kësaj skeme përjashton pothuajse tërësisht të gjithë pensionistët me pensione invaliditeti, pensione jo të plota e me radhë. Kështu që çdo ditë jeta e pensionistëve bëhet më e vështirë. Në qoftë se kemi parasysh sot çmime që nuk kanë ekzistuar kurrë në tregun e zarzavateve, treg në të cilin një kg domate shitet të paktën 7 herë më shtrenjtë se 7-8 vite më parë, pra kjo bën që kjo shtresë prej 750 mijë qytetarësh të ndjenjë pamundësinë dhe vështirësi të mëdha ditore për ushqimin e vet. Kjo bën që kjo shtresë të mos mund të blejë ilaçet që i duhen për mjekimin ditor të sëmundjeve, dhe dihet se incidenca e sëmundjeve kronike në këtë shtresë është shumë, shumë e lartë,” tha Berisha.