Kryetari i Bashkisë Librazhd, z. Mariglen Disha, ka qenë sot në terren, së bashku me Drejtuesin Politik të Qarkut, z. Arbjan Mazniku, për të monitoruar nga afër situatën e krijuar si pasojë e kushteve të vështira atmosferike që kanë përfshirë zonën.
Sipas informacioneve zyrtare, në Njësinë Administrative Steblevë trashësia e dëborës ka kaluar mbi 40 centimetra, duke vështirësuar qarkullimin. Megjithatë, strukturat përgjegjëse janë angazhuar maksimalisht dhe po punohet pa ndërprerje për të mbajtur rrugët të hapura dhe të aksesueshme për banorët.
Bashkia Librazhd bën me dije se në të gjitha njësitë administrative po zhvillohet monitorim i vazhdueshëm i situatës dhe strukturat e emergjencave janë në gadishmëri të plotë për të përballuar çdo problematikë që mund të lindë nga moti i keq.
Në këtë kuadër, autoritetet lokale u bëjnë thirrje qytetarëve të bashkëpunojnë, të tregojnë kujdes të shtuar dhe të shmangin lëvizjet e panevojshme, deri në përmirësimin e kushteve atmosferike, duke garantuar kështu sigurinë e tyre dhe të komunitetit.