Nga 10 dhjetori, platformat e mediave sociale do të duhet të marrin masa për të mos lejuar përdoruesit nën 16 vjeç të hapin llogari në Australi, dhe të çaktivizojnë llogaritë ekzistuese të kësaj grupmoshe. Qeveria thotë se ndalimi, i pari i këtij lloji në botë, synon të ulë ekspozimin e fëmijëve ndaj përmbajtjeve të dëmshme dhe presioneve të mediave sociale.
Një studim i porositur nga qeveria tregoi se 96% e fëmijëve 10–15 vjeç përdorin rrjetet sociale dhe shumica e tyre janë përballur me përmbajtje të rrezikshme, nga mizogjinia deri te video që promovojnë çrregullime të të ngrënit, vetëvrasje apo edhe “grooming” nga të rriturit.
Cilat platforma preken?
Ndalimi përfshin Facebook, Instagram, Snapchat, Threads, TikTok, X, YouTube, Reddit, Kick dhe Twitch. Qeveria mund ta zgjerojë listën edhe në lojërat online, ndërsa platforma si Roblox dhe Discord kanë shtuar kontrolle moshe për të shmangur përfshirjen.
Si do të zbatohet ndalimi?
Përdoruesit dhe prindërit nuk do të ndëshkohen; përgjegjësia bie mbi kompanitë, të cilat rrezikojnë gjoba deri në 49.5 milionë dollarë australianë. Ato duhet të përdorin metoda të verifikimit të moshës, si dokumente identifikimi, njohje të fytyrës ose teknologji të vlerësimit të moshës. Meta, Snapchat dhe platformat e tjera kanë njoftuar hapat e parë për zbatim.
A do të funksionojë?
Ekspertët kanë ngritur dyshime për efektivitetin e teknologjive të verifikimit, duke paralajmëruar se mund të gabojnë në identifikimin e të miturve ose të rriturve. Disa kritikë e konsiderojnë ndalimin të paplotë, pasi lojërat online, faqet e takimeve dhe chatbot-et e inteligjencës artificiale nuk përfshihen.
Ka shqetësime edhe për privatësinë, pasi verifikimi kërkon mbledhje të dhënash sensitive. Qeveria thotë se legjislacioni përfshin mbrojtje të forta dhe kërkon shkatërrimin e të dhënave pas përdorimit.
Si reaguan kompanitë?
Shumë platforma u shprehën kundër ndalimit, duke e konsideruar të vështirë për t’u zbatuar dhe të rrezikshëm për privatësinë. Google po shqyrton një padi ligjore, ndërsa TikTok e Snap thonë se nuk e mbështesin politikën, por do ta zbatojnë.
A do e anashkalojnë fëmijët ndalimin?
Shumë adoleshentë po hapin llogari me mosha të rreme ose po planifikojnë të përdorin VPN. Të tjerë po kalojnë në llogari të përbashkëta me prindërit ose po kërkojnë platforma alternative.
