Gjyqtari Asim Vokshi u betua këtë të martë në Presidencë si anëtari më i ri i Gjykatës Kushtetuese, duke zëvendësuar gjyqtaren Holta Zaçaj, mandati i së cilës ka përfunduar që në muajin prill.
Vokshi u shpall fitues nga Gjykata e Lartë në procesin e përzgjedhjes për vendin vakant të Zaçajt, por rezultati u kundërshtua nga kandidatja tjetër, Naureda Llagami. Kjo e fundit pretendoi se një votë e shpallur e pavlefshme i takonte asaj dhe se kjo do ta bënte fituese të mandatit. Llagami e çoi çështjen fillimisht në Gjykatën Administrative dhe më pas në Gjykatën Kushtetuese, por procesi nuk ndryshoi rezultatin.
Me betimin e Vokshit, Holta Zaçaj largohet nga Gjykata Kushtetuese, ku mbante edhe funksionin e kryetares së institucionit. Largimi i saj hap rrugën për zgjedhjen e një kryetari të ri, ndërsa përkohësisht detyrën e drejtueses e ushtron nënkryetarja Marsida Xhaferllari.
Asim Vokshi do të shërbejë me një mandat të plotë nëntëvjeçar. Ai priti rreth dy muaj për t’u betuar dhe për të marrë zyrtarisht detyrën.