Qytetarët shqiptarë tashmë mund të aplikojnë për pasaportë dhe kartë identiteti online përmes platformës e-Albania, përfshirë edhe shqiptarët rezidentë jashtë kufijve.
Sipas të dhënave të publikuara nga e-Albania, nga janari deri në gusht të vitit 2025 janë kryer 53,408 aplikime, një rritje prej 9.2% krahasuar me të njëjtën periudhë të vitit 2024. Që prej vitit 2016, përllogariten 742,969 aplikime online, mesatarisht 82,000 aplikime në vit.
Gjatë procesit të aplikimit, qytetarët zgjedhin datën dhe orën e takimit pranë ambasadës ose konsullatës në vendin ku jetojnë. Pas përfundimit të aplikimit online, qytetarët njoftohen me e-mail për detajet e pagesës dhe dokumentacionin që duhet të kenë me vete ditën e takimit.
Qytetari është i detyruar të paraqitet personalisht në përfaqësi për të lënë shenjat e gishtërinjve.
Pasaporta ripajiset për arsye të ndryshme, si:
- udhëtimi ose qëndrimi në vende që kërkojnë afat të caktuar vlefshmërie,
- ndryshimi i gjendjes civile,
- plotësimi i fletëve me shënime zyrtare,
- dëmtimi fizik, humbja ose vjedhja e pasaportës.
Ky proces online e bën më të thjeshtë dhe të sigurt aplikimin për dokumente identiteti, duke kursyer kohë dhe shmangur pritjet në sportele.
