Biblioteka Publike e Qytetit “Qemal Baholli” në Elbasan përmbylli veprimtaritë e zhvilluara gjatë muajit tetor, i cili u dedikua plotësisht letërsisë dhe leximit.
Gjatë tetorit, biblioteka u kthye në një hapësirë të gjallë kulture, ku u organizuan aktivitete të larmishme që sollën më afër lexuesit me autorët dhe botën e librit. Pati takime me shkrimtarë e poetë, lexime publike, promovime librash, si edhe aktivitete të veçanta për fëmijë e të rinj, të cilat e shndërruan “Muajin e Letërsisë” në një udhëtim të bukur përmes fjalës së shkruar dhe emocioneve që ajo përcjell. Këto veprimtari, të zhvilluara me mbështetjen e Bashkisë Elbasan, synojnë të nxisin dashurinë për librin dhe kulturën e leximit.
Biblioteka “Qemal Baholli” bën të ditur se fryma e letërsisë do të vazhdojë të mbetet e gjallë në çdo ditë të vitit, si pjesë e pandarë e jetës kulturore të qytetit të Elbasanit. Ndërkohë që Bashkia Elbasan mbetet e angazhuar në mbështetjen e institucioneve kulturore të qytetit, duke siguruar që leximi dhe aktivitetet kulturore të zhvillohen dhe përmirësohen çdo vit.