Dy ndeshjet e sotme, Flamurtari–Tirana dhe Partizani–Vllaznia, mbyllën javën e 12-të në Superiore. Të dyja sfidat përfunduan me rezultatin 1-1, duke mos ndryshuar shumë situatën në zonën e poshtme të renditjes.
Flamurtari dhe Tirana mbeten respektivisht në vendin e 9-të dhe 10-të, ndërsa Partizani, falë pikës së marrë ndaj Vllaznisë, ngjitet në vendin e 7-të.
Në takimet e ditës së djeshme, Egnatia arriti një fitore me peshë ndaj Bylisit, duke triumfuar me shifrat 5-1. Ky sukses u shfrytëzua edhe më shumë për shkak të barazimit mes Elbasanit dhe Dinamos, duke i lejuar rrogozhinasit të forcojnë pozitat në krye.
Në ndeshjen tjetër, Teuta mposhti Vorën dhe vijon të jetë vetëm 1 pikë larg Dinamos në garën për kreun e tabelës.