Në kuadër të Javës së Moshës së Tretë, Muzeu Etnografik i Elbasanit, në bashkëpunim me Qendrën Sociale “A2B”, priti sot një grup të moshuarish në një vizitë që u kthye në një përvojë të ngrohtë, plot kujtime, emocione dhe dashuri për trashëgiminë kulturore.
Në mjediset mikpritëse të muzeut, pjesëmarrësit patën mundësinë të udhëtojnë në kohë përmes objekteve të rralla, veshjeve popullore, veglave të punës dhe elementëve të jetës së dikurshme elbasanase. Ata ndanë kujtime të vyera nga fëmijëria, rrëfenja mbi zakonet dhe traditat familjare, si dhe përvoja që dëshmojnë për mënyrën se si ruheshin e përcilleshin vlerat brez pas brezi.
Në këtë atmosferë të ngrohtë dhe miqësore, u zhvillua një bisedë e hapur mbi trashëgiminë kulturore, ku të moshuarit shprehën krenarinë për qytetin e tyre dhe vlerësuan përpjekjet që bëhen sot për të ruajtur e promovuar pasurinë shpirtërore të Elbasanit.
Kjo nismë e përbashkët e Muzeut Etnografik dhe Qendrës “A2B” u mirëprit me shumë entuziazëm, duke treguar se kujdesi dhe respekti për moshën e tretë janë po aq të rëndësishëm sa edhe ruajtja e traditës.
Një ditë e mbushur me emocione, kujtime dhe dashuri për kulturën – aty ku e kaluara takohet me të tashmen për të ndërtuar kujtesën e përbashkët të Elbasanit!
albaniaexpress.al