Deputeti i Elbasanit, Adi Qose, ka reaguar pas seancës së fundit parlamentare, duke vënë në dukje kontrastin mes mazhorancës, që sipas tij është e mandatuar për të punuar dhe opozitës, e cila është ndëshkuar nga qytetarët për “pengmarrjen e proceseve jetike të vendit”.
“Seanca e sotme parlamentare dëshmoi edhe një herë se kush u mandatua nga shqiptarët për të punuar dhe kush u ndëshkua me votë plebishitare, si asnjëherë më parë, për pengmarrjen e proceseve jetike të vendit,” u shpreh Qose.
Duke iu referuar opozitës, ai shtoi me tone kritike: “Ata që mend nuk kanë e mend nuk nxënë, më e mira është të mbeten në botën e tyre të ‘fitoreve imagjinare’.”
Ndërkohë, deputeti i mazhorancës theksoi se shumica do të vijojë punën me besimin e qytetarëve për të çuar përpara proceset demokratike dhe integrimin europian të vendit. “Ne, me besimin e qytetarëve, do të çojmë përpara proceset demokratike të një vendi normal, në rrugëtimin e tij drejt Bashkimit Europian,” deklaroi ai.
Qose sqaroi gjithashtu se pavarësisht sjelljes së opozitës, puna në parlament do të vijojë normalisht: “Kuvendi i Shqipërisë, së bashku me Komisionet Parlamentare, do të vijojë punën normale duke hartuar dhe shqyrtuar projektligje që u shërbejnë qytetarëve.”
Sipas tij, opozita është më e izoluar se kurrë, duke luftuar me “fitore imagjinare”, ndërsa mazhoranca ka përgjegjësinë dhe mandatin për të çuar përpara proceset që kërkojnë qytetarët.
albaniaexpress.al
