Kreu i Partisë Demokratike, Sali Berisha, ka hedhur akuza të forta ndaj zëvendëskryeministres Belinda Balluku, duke u mbështetur në atë që e quan “qytetari dixhital”. Sipas tij, Balluku lakohet në disa biseda telefonike, ku përmendet si përfituese e përqindjeve të majme nga tenderë publikë.
Berisha deklaroi se ka marrë informacion se në një bisedë telefonike mes një biznesmeni dhe një personi tjetër, emri i Ballukut është përmendur si përfituesja e një përqindjeje të madhe për të akorduar një tender. Po sipas tij, ekziston edhe një regjistrim i kësaj bisede, i cili i është dërguar nëpërmjet Ergys Agasit, kryeministrit Edi Rama, rreth dy javë më parë.
“Në vend që ky regjistrim të shërbente për hetim, Rama nuk u step aspak për ta emëruar Ballukun zëvendëskryeministre. Me të e lidhin afera të tmerrshme, si tuneli i Llogarasë apo inceneratorët”, – deklaroi Berisha.
Berisha shtoi se Balluku është përgjegjëse për skandalin e tunelit të Llogarasë, ku sipas tij janë zhdukur jo 50, por 90 milionë euro. Ai përmendi gjithashtu edhe çështjen e inceneratorit të Tiranës, duke e akuzuar se ka bllokuar mbikëqyrjen që i takonte sipas kontratës.
“Balluku nuk dorëzoi asnjë raport mbi mbikëqyrjen, duke tentuar të fshihte gjurmët e krimit dhe duke ia hedhur fajin Erion Veliajt. Por Veliaj është po aq fajtor, sepse kishte zotim me shkrim për të mbikëqyrur ndërtimin e inceneratorit”, – tha Berisha.
