Pas mbylljes së seancës 25-minutëshe në Kuvend, ministri i Shtetit për Marrëdhëniet me Parlamentin, Toni Gogu, reagoi për mediat duke akuzuar opozitën se ndërpreu debatin parlamentar dhe e shndërroi sallën në arenë dhune.
Gogu tha se mazhoranca ishte e gatshme të zhvillonte debatin për programin qeverisës, por opozita nuk lejoi një proces normal. Ai theksoi se Kuvendi i përket qytetarëve dhe se roli i tij është garantimi i hapësirës për diskutim, por “mungoi debati parlamentar për shkak të sjelljes së opozitës”.
Ministri u ndal edhe te momenti kur kreu i grupit të PD tentoi të godiste kryeministrin Rama me librin e Kushtetutës, duke e cilësuar si dhunë të papranueshme, si verbale ashtu edhe fizike. “Ky është parlamenti i shqiptarëve që duan të shkojnë në Europë dhe duhet të jetë i lirë nga çdo shenjë dhune”, deklaroi Gogu.