Gjatë Konferencës së Kryetarëve të Parlamenteve në Gjenevë, Kryetarja e Kuvendit Elisa Spiropali zhvilloi sot takime dypalëshe me Kryetarin e Parlamentit të Suedisë, Andreas Norlén, dhe Kryetarin e Parlamentit të Gjeorgjisë, Shalva Papuashvili.
Kryetarja Spiropali diskutoi me Kryeparlamentarin suedez Norlén, mbi marrëdhëniet politike mes dy vendeve, mundësitë e intensifikimit të bashkëpunimit dypalësh, forcimin e partneritetit në NATO dhe kontributin e përbashkët për sigurinë dhe paqen. Suedia do të vijojë të mbështetesë integrimin europian të Shqipërisë dhe vendeve të Ballkanit Perëndimor.
Bashkëpunimi i deritanishëm mes Kuvendit dhe Riksdag do të vijojë edhe nëpërmjet mbështetjes për lidershipin e Kuvendit në procesin e anëtarësimit të Shqipërisë në Bashkimin Europian.
Gjatë takimit me Kryetarin e Parlamentit të Gjeorgjisë, Shalva Papuashvili, znj. Spiropali vlerësoi marrëdhëniet politike miqësore mes dy vendeve, shprehu vullnetin për forcimin e tyre, mbështetjen e Shqipërisë për sovranitetin e integritetin territorial të Gjeorgjisë si edhe aspiratat për integrimin euroatlantik.
Kuvendi do të mbështesë me asistencë teknike Parlamentin e Gjeorgjisë, si vend kandidat, në procesin e përafrimit të legjislacionit dhe aspekte të tjera të procesit të integrimit europian.
albaniaexpress.al
