Dhoma Amerikane e Tregtisë në Shqipëri (AmCham) ka inicuar krijimin e Komitetit të Sipërmarrësve të Rinj dhe Inovacionit, një platformë e re që synon të forcojë lidhjet mes gjeneratës së re të profesionistëve dhe kompanive amerikane që operojnë në rajon. Komiteti do të ofrojë mundësi për mentorim, mbështetje në zhvillimin e ideve të reja dhe startup-eve inovative, duke e bërë Shqipërinë një qendër më të hapur për sipërmarrjen dhe inovacionin.
Në kuadër të ngritjes së Komitetit, zëvendëspresidenti i AmCham, Rexhino Cekrezi, dhe drejtori ekzekutiv, Neritan Mullaj, zhvilluan së fundmi një seri takimesh në Bruksel me përfaqësues të AmChams in Europe dhe AmCham Belgium. Qëllimi i këtyre takimeve ishte të merren mësime nga praktikat evropiane mbi angazhimin e të rinjve, përfshirjen e bizneseve në programe mentorimi dhe forcimin e lidhjeve transatlantike në fushën e teknologjisë dhe sipërmarrjes.
AmCham thekson se një pjesë e rëndësishme e diskutimeve u fokusua te roli i partnerëve të biznesit dhe organizatave jofitimprurëse në Shqipëri dhe mënyra sesi ata mund të kontribuojnë në zhvillimin e këtyre nismave. Komiteti synon të krijojë një ekosistem mbështetës për të rinjtë shqiptarë, duke i lidhur ata me liderë ndërkombëtarë dhe mundësi të reja për zhvillim profesional.