Parku Arkeologjik i Shkodrës vazhdon të kryesojë listën e destinacioneve të trashëgimisë kulturore më të vizituara nga turistët vendas dhe të huaj. Sipas shifrave të tetëmujorit të këtij viti, ky park është vizituar nga rreth 125 mijë turistë.
Kalaja e Rozafës dhe historia e saj tërheq vizitorët vendas dhe të huaj. Gjatë sezonit veror, Shkodra ofron gjithashtu aktivitete për liqenin, malet, si dhe atmosferën e saj mikpritëse dhe plot sharm.
Ministri i Ekonomisë, Kulturës dhe Inovacionit, Blendi Gonxhja, ndau pamje nga Kalaja e Shkodrës, ku turistët eksplorojnë bukuritë e peizazhit dhe vlerat arkeologjike të këtij siti kulturor. Gonxhja deklaroi: “124,856 vizitorë nga e gjithë Shqipëria dhe bota kanë vizituar Parkun Arkeologjik të Shkodrës që nga fillimi i vitit, duke e renditur atë ndër destinacionet më të preferuara të turizmit kulturor në vend.”
Parku Arkeologjik i Shkodrës është një vend ku historia dhe natyra krijojnë një peizazh unik. Kalaja e Rozafës ndodhet mbi një kodër shkëmbore 130 metra mbi nivelin e detit, e rrethuar nga lumi Buna dhe lumi Drin, me një sipërfaqe prej rreth 9 hektarësh. Ajo tërheq vëmendjen e vizitorëve vendas dhe të huaj dhe ofron pamje mahnitëse për shkak të pozicionit strategjik.
Objektet monumentale dhe historike më të spikatura të kalasë përfshijnë:
- Barbakani, ndërtuar në shekullin XV në hyrje të kalasë
- Kisha e Shën Stefanit, ndërtuar në shekullin XIII, e cila u transformua më pas në xhami pas pushtimit osman
- Kapiteneria e periudhës veneciane, që sot shërben si Muzeu i Kështjellës
