Pasditen e sotme, Pallati i Sportit “Tomorr Sinani” në Elbasan çeli zyrtarisht dyert me një sfidë volejbolli për meshkuj, ku skuadra vendase e Elbasanit u përball me Studentin.
Atmosfera ishte festive në rikthimin e këtij impianti sportiv përballë publikut elbasanas, por në fushë dominuan miqtë nga Tirana. Studenti arriti një fitore të pastër me rezultatin 0-3 në sete, duke treguar epërsi të qartë në lojë.
Seti i parë u mbyll me shifrat 9-25, duke reflektuar qartë diferencën mes dy ekipeve në start. Në të dytin, Elbasani u përpoq të reagojë, por përsëri Studentët diktuan ritmin dhe fituan 17-25. Emocionet më të mëdha erdhën në setin e tretë, ku vendasit luftuan deri në fund dhe e çuan rezultatin ngushtë, por përvoja e Studentit vendosi gjithçka në 24-26.
Pavarësisht humbjes, Pallati i Sportit “Tomorr Sinani” u bë sërish skena ku sportdashësit elbasanas gjetën emocionin e tyre.