Ligjvënësit e legjislaturës së re të Kuvendit të Shqipërisë u betuan këtë pasdite, në një seancë solemne që nisi në orën 17:00. Në total, 138 deputetë lexuan formulën e betimit dhe morën zyrtarisht mandatin e tyre për katër vitet e ardhshme.
Lista e plotë e deputetëve që u betuan përfshin emra të njohur të politikës shqiptare, si kryeministri Edi Rama, lideri i opozitës Sali Berisha, kryetarët e grupeve parlamentare Taulant Balla dhe Gazment Bardhi, si dhe figura të tjera të njohura.
Megjithatë, jo të gjithë kandidatët e zgjedhur më 11 maj do të jenë pjesë e legjislaturës. Tom Doshi dhe Sabina Jorgo njoftuan tërheqjen nga mandati, duke mos e ushtruar funksionin e deputetit.
Me betimin e sotëm, Kuvendi i Shqipërisë ka hyrë në legjislaturën e tij të re, ndërsa sfidat politike pritet të jenë të forta që në javët e para të punës parlamentare.