Shtetet e Bashkuara po shënojnë 24-vjetorin e sulmeve terroriste të 11 Shtatorit 2001 me ceremoni solemne, aktivitete përkujtimore dhe vepra vullnetare në nder të gati 3 mijë viktimave.
Të afërmit e viktimave, përfaqësues shtetërorë dhe figura politike u mblodhën sot në New York, Pentagon dhe Shanksville të Pensilvanisë për të kujtuar jetët e humbura. Në Memorialin Kombëtar të 11 Shtatorit, familjarët lexuan emrat e viktimave, ndërsa momentet e heshtjes shënuan orët e goditjes së avionëve në Kullat Binjake. Në ceremoni mori pjesë edhe nënpresidenti JD Vance me bashkëshorten e tij.
Në Pentagon, ku humbën jetën 184 persona, u mbajt një shërbim përkujtimor ku morën pjesë Presidenti Donald Trump dhe Zonja e Parë Melania Trump. Ndërkohë, në Shanksville, Sekretari i Çështjeve të Veteranëve, Doug Collins, nderoi pasagjerët e Flight 93, të cilët tentuan të ndalonin rrëmbyesit.
Përveç ceremonive zyrtare, mijëra qytetarë morën pjesë në aktivitete vullnetare dhe shërbime komunitare. James Lynch, që humbi babanë e tij në sulme, tha se dhimbja mbetet e përhershme, por gjetja e gëzimit mes pikëllimit është pjesë e jetës.
Përkujtimet e këtij viti zhvillohen në një klimë politike të tensionuar, vetëm një ditë pas vrasjes së aktivistit konservator Charlie Kirk në një universitet të Utah-ut. Autoritetet paralajmëruan masa shtesë sigurie, sidomos në Ground Zero.
Sulmet e 11 Shtatorit 2001, të organizuara nga Al-Kaeda, shkaktuan vdekjen e 2,977 personave dhe sollën pasoja globale, përfshirë nisjen e “Luftës Globale kundër Terrorizmit” dhe ndërhyrjet ushtarake amerikane në Afganistan e Irak. Procesi ndaj Khalid Sheikh Mohammed, i dyshuari kryesor si organizatori i sulmeve, mbetet ende i papërfunduar, edhe pse ai u kap në vitin 2003.
Qeveria amerikane ka shpenzuar miliarda dollarë për shëndetin dhe kompensimin e dhjetëra mijëra personave të ekspozuar ndaj pluhurit toksik në Manhattan. Sot mbi 140 mijë njerëz vazhdojnë të jenë pjesë e programeve monitoruese për pasojat afatgjata të katastrofës.
