Kryeministri Edi Rama ka prezantuar sot “Diellën”, anëtaren e parë të kabinetit qeveritar që nuk është fizikisht e pranishme, por virtuale, e krijuar nga inteligjenca artificiale.
Rama tha se “Diella” do të ketë një strukturë të posaçme mbështetëse për adoptimin e teknologjisë së AI në proceset qeverisëse, si dhe një mandat të posaçëm për të thyer paragjykimet dhe ngurtësinë e administratës publike.
Një nga detyrat kryesore që i është besuar “Diellës” është transformimi i prokurimeve publike. Pas vendimit të fundit të qeverisë së tretë për të nxjerrë tenderat jashtë ministrive, Rama tha se në mandatin e katërt synohet që tenderat publikë t’i kalohen hap pas hapi inteligjencës artificiale, duke e bërë Shqipërinë një vend ku çdo procedurë është “100% e pakorruptueshme dhe e lexueshme”.
“Mandati i ‘Diellës’ nuk do të ketë kufij gjeografik apo kombësie dhe struktura që e mbështet do të ketë të drejtën të punësojë talente nga e gjithë bota”, – deklaroi Rama, duke e cilësuar këtë hap jo fantashkencë, por një detyrë konkrete për modernizimin e qeverisjes.