Presidentja e Komisionit Evropian Ursula von der Leyen njoftoi të mërkurën se do të kërkojë sanksione dhe pezullim të pjesshëm të tregtisë me Izraelin për shkak të luftës në Rripin e Gazës. Bashkimi Evropian, me 27 vende anëtare, është thellësisht i ndarë mbi qasjen ndaj Izraelit dhe palestinezëve, dhe nuk është e qartë nëse do të gjendet shumica e nevojshme për të mbështetur masat.
Von der Leyen tha në Parlamentin Evropian se “ajo që po ndodh në Gazë ka tronditur ndërgjegjen e botës”. Ajo shtoi se komisioni do të krijojë muajin e ardhshëm një grup donatorësh për palestinezët, pjesë e të cilit do të përqendrohet në rindërtimin e Gazës.
Fjalimi i saj erdhi një ditë pasi ushtria izraelite paralajmëroi banorët e Qytetit të Gazës të evakuohen përpara ofensivës së gjerë kundër bastionit të fundit të Hamasit. Konflikti nisi më 7 tetor 2023 kur militantët e Hamasit rrëmbyen 251 njerëz dhe vranë rreth 1.200 civilë izraelitë. Lufta hakmarrëse izraelite ka shkaktuar mbi 64.000 viktima palestineze dhe ka zhvendosur pothuajse të gjithë popullsinë e Gazës.
