BERAT /SHKODËR /TIRANË, 31 tetor 2026 /Albania Express News/- Jo vetëm nga Shkodra, por edhe nga qarku i Beratit, demokratët janë mobilizuar për t’iu bashkuar protestës së thirrur sot nga Partia Demokratike në kryeqytet, në mbështetje të protestës studentore dhe kundër qeverisë Rama.
Një numër i konsiderueshëm mbështetësish të PD-së janë nisur që prej orëve të para të mëngjesit nga qarku i Beratit dhe Shkodrës drejt Tiranës. Lëvizje të shumta janë regjistruar nga degët e Partisë Demokratike në Berat, Kuçovë, Dimal, Skrapar dhe Poliçan.
Sipas të dhënave nga organizimi i demokratëve në këtë qark, rreth 60 automjete janë nisur vetëm nga rrethi i Beratit, ndërsa në të gjithë qarkun numri i automjeteve që janë bërë pjesë e mobilizimit i kalon 125.
Protestuesit janë organizuar në grupe të vogla, duke udhëtuar me automjetet e tyre private dhe në orare të ndryshme. Një pjesë e tyre janë nisur që mbrëmjen e kaluar, ndërsa të tjerë gjatë mëngjesit të sotëm.
Kjo mënyrë organizimi, sipas burimeve nga PD-ja, synon të shmangë pengesat e mundshme gjatë udhëtimit drejt kryeqytetit.
Demokratët e Shkodrës dhe Beratit pritet t’i bashkohen protestës së sotme në Tiranë, e cila zhvillohet në një klimë të tensionuar politike dhe në një moment kur protesta studentore kundër qeverisë vijon prej 19 ditësh.