Ministri i Shtetit për Pushtetin Vendor, Arbjan Mazniku, gjatë konferencës “Diplomacia e zgjuar dhe zhvillimi i qëndrueshëm: Pozicionimi i Shqipërisë si një destinacion i përgjegjshëm dhe inovativ”, theksoi se turizmi dhe eksportet janë dy shtylla kryesore për zhvillimin ekonomik dhe promovimin e zonave me potencial të lartë, përtej destinacioneve tradicionale.
“Turizmi është produkt eksporti. Çdo koncept zhvillimi duhet të lidhet me kapacitetin tonë për të eksportuar”, u shpreh Mazniku.
Ai solli shembullin e Treganit në Elbasan, ku vetëm gjatë sezonit të llixhave regjistrohen rreth 700 mijë netëfjetje në vit, një shifër e krahasueshme me destinacionet më të frekuentuara bregdetare. Sipas tij, kjo zonë ka potencial të madh për rritje dhe kërkon promovim të posaçëm, veçanërisht për tregjet e huaja si Kosova dhe Bullgaria.
Ministri foli edhe për nismën “Paketa e Maleve”, e cila synon të kthejë në funksion turistik 60–70% të territorit shqiptar që përbëhet nga zona malore. Objektivi është zhvillimi i turizmit aktiv, kapërcimi i sfidave të pronësisë dhe integrimi i bujqësisë si pjesë e paketës së zhvillimit rural.
Bujqësia dhe potenciali i eksporteve
Mazniku përmendi disa shembuj konkretë të zhvillimit bujqësor:
-
Në Jagodinë të Elbasanit, prodhimi i lakrës së Brukselit është rritur 6 herë në 5 vitet e fundit, dhe i gjithë produkti shkon për eksport në tregjet evropiane.
-
Vetëm 10% e tokës bujqësore është e shfrytëzuar me serra, ndërkohë që potenciali është 10-fish më i madh.
-
Në Belsh, një kompani e huaj ka parablerë vaj ulliri me çmim dyfish më të lartë se tregu lokal, duke treguar vlerën e produkteve autentike shqiptare.
Një tjetër shembull sipas tij është zona e ish-Metalurgjikut në Elbasan, ku prodhohen turbina për hidrocentrale që eksportohen deri në Australi, duke dëshmuar se edhe prodhimi industrial shqiptar ka potencial për të konkurruar ndërkombëtarisht.
Mazniku përfundoi se Shqipëria duhet të forcojë bashkëpunimin ndërkombëtar dhe diplomacinë ekonomike, për të lidhur kapacitetet vendore me kërkesën globale dhe për të përshpejtuar zhvillimin e qëndrueshëm të vendit.
