Kryetarja e Kuvendit, Elisa Spiropali, priti sot në Kryesinë e Kuvendit ministrin e Punëve të Jashtme të Qipros, Constantinos Kombos, në një takim ku ishte e pranishme edhe ambasadorja Luela Hajdaraga.
Gjatë bisedimeve, palët diskutuan zgjerimin e bashkëpunimit të suksesshëm mes dy vendeve, intensifikimin e bashkëpunimit parlamentar, si dhe vijimin e mbështetjes për anëtarësimin e Shqipërisë në Bashkimin Evropian.
Kryetarja Spiropali vuri në dukje: “Marrëdhëniet e shkëlqyera dypalëshe politike dhe bashkëpunimi parlamentar me Qipron po zgjerohen dhe intensifikohen në të gjitha nivelet”. Ajo shtoi se Presidenca qipriote e Bashkimit Evropian gjatë gjashtëmujorit të parë të vitit 2026 do të jetë një moment i favorshëm dhe mbështetje e fuqishme për procesin e anëtarësimit të Shqipërisë në BE.
Nga ana e tij, ministri Kombos nënvizoi se politikat e zgjerimit dhe integrimi evropian i vendeve të Ballkanit Perëndimor do të jenë një prioritet i Presidencës qipriote, duke garantuar mbështetje të vazhdueshme për përshpejtimin e anëtarësimit të Shqipërisë në Bashkimin Evropian.