ELBASAN, 25 tetor 2026 /Albania Express News/-Kampionët zbresin në fushë pas barazimit në Danimarkë, ndërsa Dinamo synon rikthimin te rezultatet pozitive. Bruno Dita pritet të jetë titullar në përballjen e rëndësishme të Superiores.
ELBASAN – Stadiumi “Elbasan Arena” do të jetë të dielën arena e një përballjeje interesante të javës së tetë të kampionatit shqiptar të futbollit, ku Dinamo City do të presë kampionët në fuqi të Egnatias.
Skuadra e Egnatias vjen në këtë takim pas barazimit 1-1 në transfertë ndaj Aarhusit në Danimarkë, në kuadër të Ligës së Konferencës. Angazhimi në arenën europiane e ka detyruar ekipin rrogozhinas të ketë një kalendar të ngjeshur, ndërsa tashmë vëmendja rikthehet te kampionati shqiptar.
Në krahun tjetër, Dinamo ka pasur më shumë kohë për t’u përgatitur për këtë sfidë, pasi ndeshjen e fundit e zhvilloi ndaj Teutës, ku u mposht. Skuadra kryeqytetase do të kërkojë të reagojë dhe të rikthehet te rezultatet pozitive.
RIKTHIMI I BRUNO DITËS, NJË PËRFORCIM I RËNDËSISHËM
Lajmi më pozitiv për trajnerin Ilir Daja është rikthimi në grup i Bruno Ditës. Kapiteni pritet ta nisë ndeshjen nga minuta e parë, duke i dhënë më shumë siguri dhe eksperiencë repartit defensiv të bluve.
Ndërkohë, Sembene dhe Ajzeraj vijojnë të jenë jashtë për shkak të problemeve fizike dhe po ndjekin programin e rikuperimit.
Në portë pritet të jetë Teqja, ndërsa në mbrojtje Ismaili dhe Loran parashikohen në krahë. Në qendër, rikthimi i mundshëm i dyshes Bruno Dita–Aliji do t’i japë trajnerit Daja më shumë alternativa dhe stabilitet.
Në mesfushë pritet të aktivizohen Qefalija dhe i riu Skënder Meta, ndërsa në krahët e avancuar parashikohen Malomo dhe Vila. Silva dhe Riçards pritet të mbështesin sulmuesin Hekuran Berisha.
NJË SFIDË ME PESHË PËR TË DYJA SKUADRAT
Për Dinamon, kjo përballje përfaqëson një mundësi për të lënë pas humbjen e fundit dhe për të rifituar besimin. Për Egnatian, objektivi është të ruajë vazhdimësinë pozitive dhe të mos humbasë terren në garën e Superiores, pavarësisht lodhjes nga angazhimi europian.
Përballja në “Elbasan Arena” pritet të ofrojë rivalitet dhe emocione, me të dyja skuadrat që do të kërkojnë maksimumin në një javë të rëndësishme të kampionatit.