Donald Trump ka konfirmuar se sot ose nesër disa liderë europianë do të vizitojnë Shtetet e Bashkuara për të diskutuar rrugët për t’i dhënë fund luftës në Ukrainë. Ai shtoi se do të flasë së shpejti edhe me presidentin rus Vladimir Putin dhe sinjalizoi se administrata e tij është gati të kalojë në një fazë të dytë të sanksioneve ndaj Moskës.
Presidenti ukrainas Volodymyr Zelensky e përshëndeti idenë e sanksioneve të reja, duke u bërë thirrje vendeve europiane të ndalojnë blerjen e energjisë ruse. Këto zhvillime ndodhën pasi Rusia ndërmori bombardimet më të mëdha ajrore deri tani në Ukrainë, duke vrarë katër persona dhe duke goditur për herë të parë ndërtesën kryesore qeveritare në Kiev.
Sipas autoriteteve, Rusia qëlloi të paktën 810 dronë dhe 13 raketa gjatë sulmeve. Zelensky deklaroi për ABC News se blerja e vazhdueshme e naftës dhe gazit rus nga partnerët europianë është e padrejtë. Nga ana tjetër, Qendra për Kërkime mbi Energjinë dhe Ajrin e Pastër raporton se Moska ka përfituar rreth 985 miliardë dollarë nga shitja e naftës dhe gazit që prej marsit 2022.
