TIRANË , 7 tetor 2026 /Albania Express News/-Saranda vijon të presë fluksin e turistëve të huaj edhe në ditët e para të tetorit, me mbërritjen e kroçierës “Seabourn Quest”, e cila solli 446 pasagjerë nga vende të ndryshme të botës.
Porti i Sarandës bëri të ditur për ATSH-në se “kjo është kroçiera e 27-të që vjen në Sarandë. Ajo erdhi nga Brindizi, Itali për t’u larguar pas vizitave të planifikuara pasditen e kësaj të mërkure për në Zakintho, Greqi”.
Turistët që kanë zgjedhur të vizitojnë sot Sarandën vijnë nga vende të ndryshme të botës, mes tyre Austria, Australia, Belgjika, Kanadaja, Kosta Rika, Gjermania, Peruja, Zimbabveja, Serbia dhe Afrika e Jugut.
Gjatë qëndrimit në Sarandë, turistët do të vizitojnë qytetin, ndërsa në programin e tyre janë edhe vizitat në Parkun Kombëtar të Butrintit dhe te Syri i Kaltër.
Saranda është shndërruar vitet e fundit në një nga destinacionet më të kërkuara të turizmit detar në vend, falë pozicionit strategjik, afërsisë me ishullin e Korfuzit dhe ofertës së pasur natyrore e kulturore.
Me mbërritjen e “Seabourn Quest”, numri i anijeve turistike të ankoruara në Portin e Sarandës për këtë sezon shkon në 62, prej të cilave 27 janë kroçiera turistike.
Porti i Sarandës vijon të mbetet një nga portet kryesore hyrëse për vizitorët e huaj gjatë sezonit turistik.
Mbërritja e kroçierës “Seabourn Quest” në fillim të tetorit dëshmon se interesi i vizitorëve për Sarandën vijon edhe përtej muajve të pikut të sezonit veror, duke e shtrirë turizmin detar edhe në periudhën e vjeshtës.