Punimet në kantierin pranë lumit Buna po vazhdojnë me ritme të qëndrueshme. Projekti i Muzeut të Lundrimit, në hyrje të qytetit të Shkodrës, po merr formë dita-ditës dhe pritet të bëhet një pikë referimi kulturore dhe turistike për gjithë rajonin.
Kryeministri Edi Rama ndau pamjet e fundit nga kantieri dhe shkruan se muzeu është një kompleks unik, i ndërthurur me hyrjen e qytetit. Projekti pritet të përfundojë më 10 shkurt 2026, me një vlerë prej rreth 2 milion eurosh. Ai është pjesë e një pakete ndërhyrjesh që synon të rrisë potencialin turistik të Shkodrës.
Muzeu do të përbëhet nga dy volume të vendosura njëra mbi tjetrën. Pjesa e poshtme ka formën e një kodre, ndërsa pjesa e sipërme do të jetë një “varkë pluskuese”, duke e bërë muzeun një simbol unik të peizazhit urban dhe kulturor të qytetit.
Projekti financohet nga Banka Evropiane për Rindërtim dhe Zhvillim dhe Bashkimi Evropian, duke treguar rëndësinë e tij jo vetëm për qytetin, por edhe për turizmin dhe kulturën rajonale.