Kosova, nën drejtimin e trajnerit Franco Foda, ka nisur me humbje rrugëtimin në kualifikueset e Botërorit 2026. Përfaqësuesja dardane u mposht 4-0 nga Zvicra në Bazel, në një ndeshje të Grupit B.
Takimi u vendos që në pjesën e parë, ku zviceranët shënuan katër gola, duke e kthyer sfidën në një përvojë të vështirë për Kosovën.
Pas ndeshjes, kapiteni i Zvicrës, Granit Xhaka, i cili e ka origjinën shqiptare, u ndal te paraqitja e skuadrës dhe golat e shënuar:
“Pjesa e parë ishte ndoshta më e mira që kemi bërë pas një kohe të gjatë. Nëse do të kishim luajtur në të njëjtin ritëm edhe në pjesën e dytë, rezultati mund të shkonte 6-0 ose 7-0. Kosova nuk ishte dobët, por ne ishim në një gjendje shumë të mirë. E gjithë bota e di që jam shqiptar me zemër dhe gjak, por sonte i festova golat sepse përfaqësoj Zvicrën,” tha Xhaka.
Kosova do të kërkojë reagim në ndeshjen e radhës kundër Suedisë në shtëpi për të mbajtur gjallë shpresat e kualifikimit.