Lionel Messi shkëlqeu në ndeshjen e fundit kualifikuese për Botëror me Argjentinën në Buenos Aires. Ylli i kombëtares nuk i mbajti dot lotët, pasi kjo ishte sfida e tij e fundit përpara tifozëve vendas. Me dy gola personalë, ai udhëhoqi “Albicelestët” drejt fitores 3-0 ndaj Venezuelës.
Fituesi i tetëfishtë i Topit të Artë nuk ka dhënë ende një datë të saktë për tërheqjen nga futbolli i luajtur, por 38-vjeçari konfirmoi se kjo ishte ndeshja e fundit në Argjentinë: “Të përfundoj në këtë mënyrë, këtu, me njerëzit e mi, është një ëndërr që gjithmonë e kam pasur”, tha ai mes emocioneve.
Messi theksoi se dashurinë që ka ndier për vite me Barcelonën e ka ndjerë edhe në vendlindje. I pyetur për pensionimin, ai shtoi: “Nuk është diçka që e dua apo e pres, por vitet po kalojnë.”
Me 36 gola në eliminatoret e Amerikës së Jugut, kapiteni argjentinas është tashmë rekorder absolut në historinë e kompeticionit.
