KF Shkumbini ka zyrtarizuar trajnerin e ri të skuadrës, Lorenc Pashja, një emër i njohur për futbollin peqinas dhe jo vetëm. Për klubin bardhekaltër, ky është një rikthim i një “djali të shtëpisë”, pasi Pashja është rritur dhe formuar te Shkumbini, duke qenë gjithmonë i lidhur me fatet e ekipit.
Emërimi i tij erdhi pas sigurimit të mbështetjes së plotë financiare nga Kryetari i Bashkisë së Peqinit, z. Bukurosh Maçi, i cili ka dhënë garanci për të krijuar kushtet e duhura në prag të sezonit të ri. Ky hap shihet si një pikë kthese për Shkumbinin, që synon të rikthehet në skenën e futbollit shqiptar me ambicie më të mëdha.
Grumbullimi i parë ka nisur më 1 shtator, ku Pashja do të ketë mundësi të shohë nga afër lojtarët dhe të krijojë boshtin e ekipit. Si trajner, ai ka përvojë të konsiderueshme në drejtimin e skuadrave të ndryshme, ndërsa njihet për disiplinën dhe pasionin që përcjell në punën e tij.
Nga klubi është bërë thirrje për çdo lojtar dhe dashamirës të futbollit që dëshiron të kontribuojë, të kontaktojë me drejtuesit, duke u bërë pjesë e projektit të ri. Mesazhi i qartë i Shkumbinit është se dera është e hapur për këdo që ka dëshirë të ndihmojë.
Me Pashjën në krye dhe me mbështetjen e bashkisë, tifozët bardhekaltër shpresojnë se ky sezon do të shënojë një fillim të ri dhe më të qëndrueshëm për ekipin e zemrës.
albaniaexpress.al