Më 11 shtator, në orën 09:30, në kompleksin “Xibraku” në Elbasan do të zhvillohet mbledhja e Asamblesë së Partisë Socialiste, ku pritet të prezantohet kabineti i ri qeverisës pas fitores në zgjedhjet parlamentare të 11 majit. Lajmi është konfirmuar nga Sekretari i Përgjithshëm i PS, Blendi Klosi.
Mbledhja do të nisë me fjalën e kryesocialistit Edi Rama, i cili do të paraqesë sfidat e mandatit të katërt qeverisës, me fokus integrimin europian të Shqipërisë deri në fund të kësaj dekade. Kryeministri pritet gjithashtu të zbulojë emrat e ministrave që do të përbëjnë qeverinë e re.
Partia Socialiste fitoi zgjedhjet e 11 majit me 83 mandate deputetësh, duke siguruar shumicë të plotë ndaj Partisë Demokratike dhe aleatëve të saj, të cilët së bashku fituan 50 vende në Kuvend. Ky është mandati i katërt radhazi për socialistët që prej vitit 2013, një rezultat i paprecedentë në historinë pluraliste të Shqipërisë.