Elbasani ka mbyllur përgatitjet për njërën nga sfidat më të forta të këtij fillimsezoni: përballjen me kampionët në fuqi, Egnatian. Pas fitores në debutim kundër Flamurtarit, verdheblutë kërkojnë të konfirmojnë ecurinë pozitive, ndërsa trajneri Ivan Gvozdenoviç ka dhënë mesazhe të balancuara dhe plot besim.
“E respektojmë shumë Egnatian, pasi kanë një skuadër të shkëlqyer dhe jo më kot janë dy herë radhazi kampionë. Megjithatë, ne do të mendojmë për veten tonë dhe si në çdo ndeshje do të japim maksimumin. Për Elbasanin, çdo kundërshtar vlerësohet maksimalisht. Kemi besim në forcat tona dhe jemi gati, si psikologjikisht, ashtu edhe fizikisht e taktikisht”, u shpreh Gvozdenoviç.
Formacioni mbetet sekret
Tekniku serb nuk ka zbuluar ende kartat për formacionin, duke lënë hapësirë për surpriza deri në momentin e fundit. Ky fleksibilitet tregon gatishmërinë për të përshtatur planin e lojës sipas kundërshtarit dhe formës së lojtarëve.
“Çdo gjë është e hapur. Mund të bëjmë ndonjë lëvizje, por vendimi përfundimtar do të merret pas stërvitjes së fundit dhe konsultimit me stafin”, shpjegoi ai.
Harmoni dhe integrim në grup
Gvozdenoviç vlerësoi afrimet e merkatos, jo vetëm për cilësinë, por edhe për atmosferën që kanë sjellë në skuadër. “Të rinjtë janë integruar shumë mirë dhe jam i sigurt se edhe tifozët janë të kënaqur. Unë jam i kënaqur me të gjithë lojtarët, jo vetëm me të afruarit”, tha tekniku verdheblu.
Vazhdimësia mbi gjithçka
Fitorja ndaj Flamurtarit i ka dhënë moral skuadrës, por Gvozdenoviç nuk lejon që lojtarët të pushojnë mbi dafina. Ai e sheh sezonin si një garë afatgjatë, ku çdo ndeshje ka peshë të veçantë.
“Dy fazat e para janë shumë të rëndësishme, sepse vlejnë për të ndërtuar stabilitet. Ne i marrim ndeshjet një e nga një dhe tani fokusi është vetëm tek Egnatia”, përfundoi trajneri.
Elbasani shkon në Rrogozhinë për të luftuar deri në fund, duke respektuar kampionët, por pa hequr dorë nga ambiciet e veta.
albaniaexpress.al
