Kukësi arriti të marrë një fitore të rëndësishme në ndeshjen e parë të sezonit, duke mundur Apoloninë me rezultatin 2-1. Golat e shënuar nga Redon Dragoshi dhe Oniks Grezda siguruan tri pikët e para për ekipin, ndërsa lojtarët shprehen të kënaqur me paraqitjen dhe optimistë për vazhdimësinë e sezonit.
Një fitore në start ka vlerë të madhe për moralin, dhe në kampin blu e konsiderojnë këto tri pikë tepër të rëndësishme. Atmosfera në fushë dhe në pankinë ishte pozitive, ndërsa tifozët përshëndetën lojën dhe golat e shënuar. Pas ndeshjes, dy protagonistët, Dragoshi dhe Grezda, shprehën kënaqësinë dhe motivimin e tyre për sfidat e ardhshme.
Dragoshi: Fillim i mirë për një epokë të re tek Kukësi
Kapiteni Redon Dragoshi, një nga futbollistët më me eksperiencë të Kukësit, shpreson që kjo fitore të jetë një ogur i mirë për fillimin e një epoke të re për blutë.
“Jam shumë i lumtur për këtë ndeshje, sepse arritëm të marrim tri pikë. Kemi punuar shumë mirë me trajnerin dhe shpresoj që ky start i mirë të jetë me këmbë të mbarë për këtë sezon. Afrimet kanë qenë cilësore, ekipi ka cilësi dhe shpresoj që të arrijmë objektivat që ta dërgojmë Kukësin në Superligë. Edhe pse është shumë shpejt të flas për këtë gjë, është vetëm ndeshja e parë. Detyra jonë në shtëpi ishte për të fituar. Sidoqoftë shpresoj që ky të jetë fillimi i një epoke të re tek Kukësi”, tha mbrojtësi që shënoi golin e dytë të ndeshjes.
Dragoshi thekson se ekipi është i motivuar dhe mund të jetë konkurrues gjatë gjithë sezonit.
Grezda: Kontribut i drejtpërdrejtë në fitore
Sulmuesi Oniks Grezda ishte protagonist absolut i ndeshjes me fierakët, duke kontribuar me golin dhe asistin e tij. Ai shprehet i kënaqur për paraqitjen e tij dhe optimist për zhvillimet e ardhshme.
“Jam shumë i lumtur për këtë fitore dhe që kontribuova për t’i dhënë tri pikë klubit. Kjo vjen si rezultat i punës dhe sakrificës tonë gjatë kësaj faze përgatitore. Disa lojtarë jemi edhe nga sezoni i kaluar, por me afrimet e reja po përshtatemi mirë. Besoj se në vazhdim do të jemi edhe më mirë”, tha sulmuesi i verilindorëve.
Fokus te ndeshja e radhës
Skuadra e Kukësit tani fokusohet te ndeshja e radhës, që zhvillohet në transfertë ndaj Burrelit. Lojtarët janë optimistë se me këtë formë dhe motivim, mund të arrijnë një tjetër rezultat pozitiv, duke vazhduar serinë e fitoreve dhe rritjen e moralit para sfidave të tjera të sezonit.
albaniaexpress.al
