Lini, rreth 22 km larg Pogradecit, është një nga atraksionet më të preferuara, jo vetëm për pushuesit vendas, por edhe për turistët e huaj. Pas zbulimeve arkeologjike më të fundit, ku Lini konsiderohet vendbanimi palafit më i hershëm në Europë, fshati po tërheq edhe më shumë vizitorë.
Ministri i Ekonomisë, Kulturës dhe Inovacionit, Blendi Gonxhja, ndau sot pamje nga Lini, ku turistë të shumtë vizituan këtë vend, duke fotografuar bukuritë dhe mozaikët e vjetër. “Lini, vendbanimi më i vjetër në Europë, ka qenë këtë verë magnet për turistët, jo vetëm për bukuritë buzë Liqenit të Ohrit, por edhe për Bazilikën Paleokristiane, një monument me mozaikë të mrekullueshëm të shek. V–VI,” shkruan Gonxhja.
Bazilika e Linit këtë sezon u vizitua nga 4735 turistë, prej të cilëve 3298 ishin të huaj dhe 1437 vendas. Në Lin janë ndërtuar disa bujtina që mirëpresin vizitorë nga e gjithë bota. Fshati, i vogël dhe piktoresk, shfaqet menjëherë sapo zbret Qafëthanën në Pogradec, duke ofruar peizazhe të rralla.
Sipas gojëdhënave, gadishulli i Linit dikur ishte një ishull i bukur me bimësi të dendur. Jeta aty ka filluar në Epokën e Hekurit dhe ka vazhduar deri në Mesjetën e Hershme. Origjina e emrit thuhet se lidhet me ushtarët e Jul Çezarit, të cilët, mahnitur nga bukuria, thanë “Lyhnidas”, që do të thotë “Liqeni i Dritës”.