Radha 1, karrigia 1, bileta nr. 45/47 – kjo është bileta e parë simbolike e finales së Kupës së Botës 2026, të cilën kreu i FIFA-s Gianni Infantino ia dhuroi presidentit amerikan Donald Trump. Finalja do të luhet më 19 korrik 2026 në SHBA, me ndeshje të tjera që do të zhvillohen edhe në Kanada dhe Meksikë.
Infantino i solli Trump-it edhe trofeun legjendar të Botërorit, duke e ftuar ta mbante në dorë. “A mund ta mbaj?”, pyeti Trump me entuziazëm, duke vlerësuar se kupa do t’i shkonte për shtat dekorit të Zyrës Ovale, të stolisur me elemente të arta.
“Është vetëm për fituesit, por meqë ju jeni një fitues, mund ta prekni gjithashtu”, u shpreh Infantino. “Është një copë e bukur ari”, komentoi Trump, i cili ka në zyrën e tij edhe një trofe të Kupës së Botës për Klube.