Një ngjarje e rëndë ka tronditur këtë të shtunë opinionin publik dhe botën e medias shqiptare. Gazetari i njohur, analisti dhe intelektuali i spikatur, Artur Zheji, ka ndërruar jetë në moshën 64-vjeçare, pas një arresti të dyshuar kardiak, ndërsa ndodhej për pushime në qytetin bregdetar të Sarandës.
Sipas burimeve zyrtare, ngjarja ka ndodhur në orët e pasdites, në një restorant të njohur përgjatë rrugës “Butrinti”, ku Zheji po drekuar në shoqërinë e bashkëshortes dhe djalit të tij. Gjatë qëndrimit në lokal, ai ka shfaqur shenja të papritura gjendjeje të rënduar shëndetësore, çka ka alarmuar familjarët dhe stafin e restorantit.
Menjëherë është thirrur autoambulanca, e cila ka mbërritur në vendngjarje dhe ka transportuar gazetarin drejt urgjencës së spitalit “Petro Nako” në Sarandë. Pavarësisht përpjekjeve të personelit mjekësor për ta reanimuar, Artur Zheji ka mbërritur pa shenja jete në spital. Paraprakisht dyshohet se shkaku i vdekjes ka qenë një arrest kardiak, megjithatë autoritetet shëndetësore kanë nisur procedurat për përcaktimin zyrtar të shkaqeve të ndarjes nga jeta.
Artur Zheji ka pasur një karrierë të gjatë dhe të pasur si gazetar, analist politik, botues dhe shkrimtar. I njohur për analizat e tij të mprehta dhe stilin e drejtpërdrejtë, ai ka kontribuar në disa nga mediat më të rëndësishme të vendit dhe ka qenë i pranishëm për dekada në skenën publike, duke luajtur një rol të rëndësishëm në formësimin e opinionit shoqëror dhe politik në Shqipëri.
Humbja e tij lë një boshllëk të ndjeshëm në botën e medias dhe të mendimit kritik shqiptar. Redaksia e “Albania Express News” i shpreh ngushëllime familjes, miqve dhe të gjithë atyre që e kanë njohur dhe vlerësuar punën dhe figurën e tij.