Në disa zona të qarkut Elbasan gjatë orëve të fundit u shënuan disa vatra zjarri, të cilat u neutralizuan në kohë falë ndërhyrjes së shpejtë të strukturave zjarrfikëse dhe banorëve të zonave përkatëse. Në fshatin Jetesh, Njësia Administrative Papër, një zjarr i shkaktuar nga pakujdesia gjatë djegies së mbeturinave përfshiu një ullishte prej 2 dynymësh.
Zjarri u vu nën kontroll brenda 35 minutash me ndihmën e zjarrfikësve dhe rreth 20 banorëve të zonës. Një tjetër vatër u shfaq në fshatin Vasjan, Shushicë, ku një dynym pyll ahu u përfshi nga flakët. Ndërhyrja e 10 punonjësve të ndërmarrjes pyjore bëri të mundur shuarjen e zjarrit pa dëme të mëdha.
Rasti më i rëndë u regjistrua në Malasenj, bashkia Cërrik, ku një zjarr në zonën “Kodra e Beut” dogji rreth 5 hektarë ullishte. Dyshohet se shkaku ishte një defekt në linjat e energjisë elektrike. Zjarri përfshiu rreth 100 rrënjë ullinj dhe dëmtoi 400 të tjera, por fatmirësisht nuk pati të lënduar. Autoritetet lokale bëjnë thirrje për kujdes të shtuar në përdorimin e zjarrit në mjedise të hapura dhe monitorim të linjave elektrike në zona rurale për të parandaluar incidente të ngjashme.
albaniaexpress.al