Futbolli shqiptar po bën hapa përpara jo vetëm me skuadrat në arenën europiane, por edhe me arbitrat që gjykojnë në nivele të larta. UEFA ka caktuar dy ekipe arbitrash shqiptarë për ndeshjet e raundit play-off të UEFA Conference League, një tjetër dëshmi e rritjes së standardit dhe besimit që gëzojnë gjyqtarët tanë.
Ndeshja e madhe Sparta Praha – Riga i është besuar një prej arbitrave më me përvojë të vendit, Enea Jorgji, i cili prej vitesh mban stemën e FIFA-s dhe është kthyer në një figurë të konsoliduar në arenën ndërkombëtare. Ai do të shoqërohet nga Denis Rexha dhe Ridiger Çokaj si asistentë, me Florian Lata gjyqtar të katërt dhe Albert Doda si AVAR.
Në sfidën Başakşehir – U. Craiova, gjyqtar kryesor do të jetë Juxhin Xhaja, i ndihmuar nga Arbër Zalla dhe Rejdi Avdo. Olsid Ferataj do të jetë gjyqtar i katërt, ndërsa teknologjia e VAR-it do të menaxhohet nga Kreshnik Bajramaj (VAR) dhe Olsion Yzeiraj (AVAR).
Caktimet e tilla tregojnë qartë se arbitrat shqiptarë po fitojnë terren dhe po marrin vlerësimin e merituar nga UEFA. Në veçanti, Enea Jorgji vazhdon të jetë një prej emrave më të spikatur, duke dëshmuar autoritet, qetësi dhe profesionalizëm në ndeshje të nivelit të lartë.
Ky është një sinjal pozitiv për futbollin shqiptar: gjyqtarët tanë po fitojnë besim ndërkombëtar dhe po rriten në të njëjtën kohë me lojën.
albaniaexpress.al
