Një person ka humbur jetën dhe gjashtë të tjerë janë shtruar në spital pasi u ndjenë keq gjatë festivalit muzikor “Dreamstate”, i mbajtur në Sydney, Australi.
Sipas mediave lokale, viktima, një burrë rreth të 40-ave, ka pësuar një kolaps në ambientet e Sydney Olympic Park. Pavarësisht përpjekjeve të stafit mjekësor të festivalit, ai ka ndërruar jetë në vendngjarje.
Gjashtë persona të tjerë janë transportuar me urgjencë në spital, ku njëri prej tyre ndodhet në gjendje kritike.
Ngjarja e rëndë është aktualisht nën hetim dhe autoritetet kanë bërë të ditur se do të përgatitet një raport mjeko-ligjor.
Sipas 9News Australia, dyshohet se burri ka ndërruar jetë si pasojë e një arresti kardiak të shkaktuar nga një mbidozë e dyshuar droge.
Festivali “Dreamstate” u mbajt të shtunën në Sydney, ndërsa dita e dytë ishte planifikuar të zhvillohej të dielën në Melbourne. Në faqen zyrtare, eventi përshkruhet si “destinacioni i fundit i muzikës techno”, i njohur për shfaqje madhore me prodhim të lartë në mbarë botën.
Organizatorët e “Dreamstate” nuk kanë reaguar ende zyrtarisht për incidentin, por para eventit të së dielës kanë paralajmëruar për kapsula dhe pilula MDMA me dozë të lartë.
“Jemi të shqetësuar për qarkullimin e zgjatur të këtyre tabletave MDMA me dozë të lartë dhe u bëjmë thirrje qytetarëve të jenë të kujdesshëm, veçanërisht ata që marrin pjesë në festivale të mëdha në javët në vijim,” ka deklaruar drejtori i Qendrës së Informacionit për Helmet në NSW, Darren Roberts.