Elbasani do të zbresë në fushë këtë të shtunë në orën 16:30, ku do të përballet me Vorën në një takim tejet të rëndësishëm për objektivat e skuadrës verdheblu. Përballja vjen në një moment delikat, dhe trajneri duhet të menaxhojë jo pak mungesa në prag të sfidës.
Për sa i përket ndeshjes së radhës me Vorën, Elbasani do të përballet me disa mungesa të rëndësishme. Sulmuesi Karim Loukili do të jetë jashtë liste, pasi ka mbushur numrin e kartonëve dhe, për këtë arsye, nuk do të jetë i disponueshëm për trajnerin. Largimi i tij për këtë takim përbën një minus të konsiderueshëm për repartin ofensiv, duke qenë se Loukili ka qenë një nga pikat e forta të skuadrës në javët e fundit.
Ndërkohë, mbeten ende dyshime mbi gjendjen fizike të Ibrahima Diallos dhe Bledar Lilës, të cilët munguan edhe në përballjen e fundit ndaj Vllaznisë për shkak dëmtimesh. Stafi mjekësor po punon intensivisht për rikuperimin e tyre, por ende nuk ka një konfirmim përfundimtar nëse do të jenë gati për sfidën e së shtunës. Situata mbetet e hapur deri në seancën e fundit stërvitore, ku trajneri do të marrë vendimin final për aktivizimin e tyre.
Mungesat e rëndësishme e bëjnë ndeshjen më sfiduese për verdheblutë, të cilët megjithatë janë të vendosur të rikthehen te fitorja, sidomos pas barazimit të fundit. Pritet që trajneri të bëjë disa lëvizje taktike për të kompensuar mungesat, ndërsa grupi mbetet i fokusuar maksimalisht për të marrë tre pikët që do t’i jepnin frymëmarrje në renditje.