Elbasani u kthye këtë të shtunë në qendrën botërore të bektashizmit, teksa u zhvillua simpoziumi ndërkombëtar “Bektashizmi: 800 vjet histori, vlerat dhe sfidat në ditët e sotme”. Aktiviteti i përmasave të gjera u organizua nga Kryegjyshata Botërore Bektashiane dhe Gjyshata e Elbasanit, në bashkëpunim të ngushtë me komunitetet bektashiane të Ballkanit.
Në këtë veprimtari të rëndësishme morën pjesë nënkryetarja e Kuvendit të Shqipërisë, znj. Klodiana Spahiu, përfaqësues të institucioneve lokale, drejtues komunitetesh fetare, si edhe studiues të shquar nga Shqipëria, Kosova, Turqia, vendet e Ballkanit, Azisë dhe Evropës. Prania e tyre i dha simpoziumit karakter ndërkombëtar dhe e ngriti aktivitetin në nivel akademik e institucional të lartë.
Në fjalën e tij përshëndetëse, përfaqësuesi i Gjyshatës Bektashiane të Elbasanit, Haxhi Baba Admir Selmani, shprehu mirënjohje të thellë për pjesëmarrjen e gjerë dhe mbështetjen e institucioneve:
“Më lejoni t’ju falënderoj sinqerisht për praninë dhe mbështetjen. Besojmë se jemi në rrugën e duhur për të forcuar trashëgiminë shpirtërore dhe vlerat bektashiane.”
Ai theksoi se veprimtari të tilla janë thelbësore për të mbajtur gjallë traditën tetëshekullore të bektashizmit, si dhe për t’i dhënë përgjigje sfidave të kohës moderne përballë globalizmit dhe ndryshimeve sociale.
Gjatë gjithë ditës, simpoziumi u zhvillua në disa sesione shkencore, ku studiues të njohur trajtuan temat më të rëndësishme historike, teologjike dhe kulturore që lidhen me bektashizmin, rolin e tij në identitetin shqiptar dhe ndikimin e përhapur në mbarë Ballkanin dhe më gjerë.
Ky organizim i nivelit të lartë u vlerësua si një hap i rëndësishëm për forcimin e bashkëpunimit ndërkombëtar, për promovimin e vlerave të paqes, tolerancës dhe harmonisë fetare – gurë themelorë të traditës bektashiane që prej themelimit të saj.
Elbasani, për një ditë të tërë, u bë qendra ku u bashkuan historia, kultura dhe urtësia shpirtërore e tetë shekujve bektashizëm, duke dhënë mesazhe të qarta se trashëgimia shpirtërore mbetet një nga shtyllat më të rëndësishme për shoqërinë e sotme.
