Peshëngritësi shqiptar Briken Calja ka shkëlqyer në Kampionatin Ballkanik të Peshëngritjes që po zhvillohet në Durrës, duke vendosur tre rekorde të reja ballkanike dhe duke fituar tre medalje ari në kategorinë e peshës 79 kg.
Calja e nisi garën në disiplinën e shkëputjes me 150 kilogramë, peshë të cilën e ngriti me sukses, duke thyer rekordin ballkanik që qëndronte prej 25 vitesh.
Performanca e tij e jashtëzakonshme vazhdoi edhe në shtytje, ku fillimisht ngriti 180 kg dhe më pas arriti në 185 kg në provën e tretë, duke siguruar vendin e parë dhe një tjetër rekord ballkanik.
Me një total prej 335 kilogramësh në dygarësh, Briken Calja vulosi rekordin e tretë ballkanik, duke u konfirmuar si një nga sportistët më të suksesshëm shqiptarë në arenën ndërkombëtare.
Pas përfundimit të garës, kampioni u shpreh se arritja nuk ka qenë e lehtë dhe se pas suksesit fshihen shumë vite pune, sakrifice dhe përkushtimi.
Ky sukses i Caljas përfaqëson një moment krenarie për sportin shqiptar dhe veçanërisht për peshëngritjen, duke treguar se Shqipëria vazhdon të prodhojë kampionë të nivelit të lartë.
