Sipas informacioneve zyrtare të siguruara nga salla operative e Drejtorisë Vendore të Policisë së qarkut Elbasan, në fshatin Kërpicë të Njësisë Administrative Kushovë, bashkia Gramsh, është konstatuar rrezik i daljes nga shtrati i lumit të Kërpicës, si pasojë e prurjeve të shtuara të ujit.
Për të parandaluar përmbytjen dhe për të mbrojtur komunitetin lokal, Bashkia Gramsh ka dërguar menjëherë një fadromë në terren, e cila po punon për ngritjen e strukturave mbrojtëse pranë zonës së banuar. Sipas të dhënave, rrezikohen 8 banesa, të cilat ndodhen më pranë shtratit të lumit dhe janë më të ekspozuara ndaj situatës së krijuar.
Ndërkohë, për të garantuar një ndërhyrje të shpejtë në rast përkeqësimi të kushteve, në fshatin Kërpicë po mbërrin edhe një mjet zjarrfikës i MZSH Gramsh, së bashku me efektivët përkatës, të cilët do të qëndrojnë në gatishmëri për të mbrojtur banesat dhe banorët.
Autoritetet lokale dhe strukturat e emergjencave deklarojnë se situata është nën monitorim të vazhdueshëm, ndërsa po merren të gjitha masat e nevojshme për garantimin e sigurisë së komunitetit.
Strukturat përgjegjëse kërkojnë që banorët të jenë të kujdesshëm, të ndjekin udhëzimet e ekipeve në terren dhe të raportojnë çdo shqetësim të mundshëm. Autoritetet vijojnë punën për menaxhimin e plotë të situatës.