Të paktën 120 persona, mes tyre 100 oficerë policie, mbetën të plagosur gjatë përleshjeve që shpërthyen në protestat antiqeveritare në Mexico City.
Mijëra demonstrues marshuan të shtunën në kryeqytetin meksikan për të protestuar kundër krimit të dhunshëm dhe ndaj qeverisë së presidentes Claudia Sheinbaum. Sheinbaum deklaroi se marshimet – të cilat u zhvilluan edhe në qytete të tjera – ishin financuar nga politikanë të djathtë që kundërshtojnë administratën e saj.
Protesta u organizua nga grupet rinore të “Gjeneratës Z” dhe mori mbështetje të gjerë nga qytetarët të indinjuar nga valët e krimit, veçanërisht pas vrasjes së profilit të lartë të kryetarit të bashkisë së Uruapanit, Carlos Manzo, vetëm disa javë më parë. Manzo kishte bërë thirrje për veprime të ashpra kundër karteleve të drogës.
Protestuesit mbanin pankarta me mesazhin “Ne të gjithë jemi Carlos Manzo”, ndërsa të tjerë mbanin kapele kaubojsh në shenjë nderimi për të. Manzo u vra më 1 nëntor, gjatë festivalit të Ditës së të Vdekurve. Ai ishte i njohur për qëndrimet e tij të hapura kundër bandave të trafikut të drogës dhe dhunës së karteleve që prej kohësh terrorizojnë vendin.