Fitorja ndaj Egnatias ka rritur edhe më shumë atmosferën pozitive te Elbasani. Mesfushori Isi Manellari, një nga afrimet e verës, thekson se skuadra po funksionon si grup dhe se ky është sekreti i rezultateve të fundit.
“Kemi katër fitore radhazi dhe kjo tregon punën që po bëjmë çdo ditë. Ishte një fitore e rëndësishme ndaj një rivali direkt dhe na jep moral të vazhdojmë në këtë ritëm”, është shprehur ai.
Manellari thekson se pavarësisht afrimit të vonë në skuadër, integrimi ka qenë i menjëhershëm.
“Kam gjetur një grup fantastik. Djemtë më kanë pritur shumë ngrohtë dhe u përshtata shpejt. Ka harmoni brenda ekipit dhe të gjithë punojmë për të njëjtin objektiv”, deklaron mesfushori.
Një rol të madh në ecurinë e skuadrës e kanë edhe tifozët.
“Elbasani ka tifozët më të mirë në Shqipëri, pa asnjë diskutim. Na mbështesin gjithmonë, kudo që shkojmë. Ndihesh me të vërtetë i detyruar t’u japësh gjithçka në fushë”, shton ai.
Aktualisht Elbasani kryeson renditjen bashkë me Vllazninë, por Manellari këmbëngul se skuadra është e fokusuar vetëm te vetja:
“Më e vështirë është ta mbash ritmin sesa ta arrish. Ne duhet të shohim punën tonë dhe të futemi në çdo ndeshje vetëm për fitore. Jemi Elbasani dhe kemi përgjegjësi”.
Sa i përket sfidës së radhës ndaj Dinamos, Manellari pret një duel të fortë:
“Dinamo është ekip i mirë, luan futboll dhe e bën lojën interesante. Ne do të hyjmë për maksimumin, me respekt për kundërshtarin, por me besim absolut te forcat tona”.