Gjykata e Lartë do të shqyrtojë këtë të enjte rekursin e paraqitur nga presidenti i Partisë së Lirisë, Ilir Meta, i cili kërkon zëvendësimin e masës së sigurisë “arrest në burg”. Meta kërkon prishjen e vendimeve të dhëna më herët nga GJKKO dhe Apeli i saj.
Relatore e çështjes është caktuar gjyqtarja Albana Boksi, ndërsa anëtarë të trupës gjykuese janë Sokol Binaj dhe Medi Bici.
Ilir Meta u arrestua më 21 tetor 2024, nën akuzën se në bashkëpunim me deputeten Monika Kryemadhi dhe funksionarë të tjerë shtetërorë, kanë abuzuar me detyrat dhe postet e tyre politike për përfitime personale.
Sipas hetimeve të SPAK, çifti Meta-Kryemadhi dyshohet se kanë favorizuar kompani private dhe janë përfshirë në lobime të dyshimta në SHBA, si dhe në transaksione shitblerjesh banesash në këmbim të shumave të mëdha parash, të cilat më pas janë përpjekur t’i fshehin.
Meta akuzohet për veprat penale të “korrupsionit pasiv”, “pastrimit të parave” dhe “fshehjes së pasurisë”. Hetimet e SPAK u mbyllën më 28 korrik, ndërsa dosja kaloi për gjykim në fund të gushtit.