Ministri i Bujqësisë dhe Zhvillimit Rural, Andis Salla, ka njoftuar se 30 shtatori është afati i fundit për aplikimet në Skemën Kombëtare të Investimeve 2025. Të gjithë fermerët, blegtorët dhe sipërmarrësit e fushës bujqësore kanë mundësi të dorëzojnë dosjet pranë zyrave qendrore të AZHBR deri në orën 16:30.
Skema është konceptuar si një instrument mbështetës për rritjen e produktivitetit, modernizimin e fermave dhe zhvillimin e qëndrueshëm rural. Ajo përfshin financime për:
- ndërtimin e serave të reja diellore,
- mbjellje të reja bujqësore,
- rrjeta mbrojtëse kundër breshërit,
- sisteme ujitjeje me pika,
- stalla blegtorale dhe stabilimente,
- mekanizim bujqësor modern,
- projekte të agropërpunimit,
- investime në agroturizëm dhe panele fotovoltaike,
- si dhe akuakulturë detare.
Ministri Salla theksoi se Skema Kombëtare e Investimeve është një nga politikat kryesore të qeverisë për të mbështetur bujqësinë dhe për t’i dhënë një nxitje të re konkurrueshmërisë së produkteve shqiptare. “Kjo është një mundësi e madhe për të gjithë ata që synojnë të rrisin kapacitetet prodhuese, të përmirësojnë cilësinë dhe të bëhen pjesë e një zinxhiri më të fortë agroushqimor,” deklaroi ai.
albaniaexpress.al
