Ekipet kryesore kombëtare në Europë po kalojnë një periudhë të vështirë, por Spanja vazhdon të qëndrojë e pathyeshme me një seri prej 30 ndeshjesh pa humbje—një tregues i qartë i nivelit dhe stabilitetit të skuadrës. Pavarësisht entuziazmit të madh që ekziston në vend për “La Roja”, trajneri Luis de la Fuente thekson se për profesionistët është e rëndësishme të qëndrojnë me këmbë në tokë.
“Në futboll askush nuk të jep asgjë falas. Të fitosh është e vështirë, sidomos kundër ekipeve si Franca, Portugalia, Italia,” – u shpreh ai, duke nënvizuar se çdo sukses kërkon vazhdimësi dhe përkushtim maksimal.
Trajneri spanjoll kujtoi se Spanja, së bashku me Anglinë, nuk ka pësuar ende asnjë gol në këtë fazë, duke u afruar drejt një rekordi të veçantë. Megjithatë, pavarësisht statistikave mbresëlënëse, objektivi mbetet i njëjtë: kualifikimi në Kupën e Botës.
“Ajo që synojmë është të sigurojmë sa më shpejt kualifikimin. Shifrat janë të rëndësishme, por mbi të gjitha duam të fitojmë, të punojmë fort dhe të bëjmë gjërat siç duhet për të rritur shanset tona,” përfundoi De la Fuente.